Það er nú einu sinni þannig að það er alltaf verið að í sveitinni og þar ríkir sönn framkvæmdagleði, í framhaldi af girðingarvinnunni þá var ákveðið að setja punktinn yfir iið með því að setja tröppur yfir girðinguna þar sem göngustígarnir liggja niður að læk og fólki bent á að nota þær leiðir ef það vill komast í lækinn.
Elfar, sérstakur tröppusmiður félagsins tók að sér verkið en ritarinn tók að sér að koma efninu á staðinn, þó með hjálp Harðar þar sem hún er nánast á annarri eftir hnéaðgerð.
Þau hjón renndu í hlaðið hjá Húsasmiðjunni rétt fyrir kl. 18:00 og þar beið þeirra heljarinnar pakki sem setja þurfti á kerruna og síðan var læðst upp í Kerhraunið á hraða snigilsins á annatíma föstudagsumferðarinnar og lái ég Herði ekki þó hann hafi á einhverjum tímapunkti haldið að Bensinn myndi lyfta framhjólunum.
Hörður er greinilega vanur flutningsmaður, kom „ÖLLU“ heilu og höldnu á staðinn og auðvitað var Birgit ekki lengi að bjóða sig fram að losa bílinn en Elfar var greinilega ekki viðlátinn en það gerði ekkert til því eins og sjá má á myndinni hér að neðan þá kann Hörður til verka.
Standa í báða fætur, vera þráðbeinn í baki, 90° horn í olbogabótinni og segja samverkakonunni að labba af stað.
Þegar spýtunni er sleppt þá er farið aftur í fyrri stöðu, 90° í hnjásbótum með spýtur milli fóta sér, en aðstoðarkonan lætur ekki að stjórn en það gerir ekkert til því um leið og Hörður er teinréttur labbar Birgit af stað.
En hvað sem öllu bulli líður þá stóðu þig sig öll alveg frábærlega og við hlökkum til að sjá nýju tröppurnar.
Takk fyrir framtakið.